Ein Gedicht

Dr Jugendchor

Edi Graf, frei nach Sebastian Blau: Dr Gsangverei‘
Gewidment dem Wurmlinger Jugendchor am 11.Mai 2019

Dorffescht oder Dorfadvent
Wa mr feiret, wa mr kennt,
d Hauptsach isch ond bleibt s isch wohr,
Z Wurmlinga dr Jugendchor.

Buaba, Mädla, Weiblen, Manna,
Diafe Bäss ond hohe Kanna,
Gymnasiaschda, Grundschualkender,
Realschualschialer ond Studenda,
Poppig, kirchlich ond bizarr
E-Bass, Keyboard ond Gitarr,
Schlagzeug ond ao Regarohr,
Caro, Resi, ond Gregor
Eva, Jannik, Florian,
Laura ond Sebaschtian
Älle send em Jugendchor
Sell isch wohr!

D Hauptsach aber konnt am End:
Ao dr beschte Chor wär weg!
Aohne reachta Dirgent,
Aohne Thommy Schneck!
So a Ma konnt et zom Schnaufa
Der isch iberlenkt s ganz Johr,
Seit zwanzg Johr – hot er den Haufa,
Dirigiert da Jugendchor,
Stimmbildung und Chorprob leida,
Sondigs orgla en dr Mess
Ha des Gschäft macht ao ma Gscheida
Wie em Thommy manchmol Stress!

Mädle klatschet, Buaba senget,
Ond d Sopräna grillet laut,
Aber wenn dr Thommy noh,
An seim Keyboard s Zeicha geit,
Horch, wia schee dia Schtemma klenget,
Jetzt gibt’s Schlager – s isch soweit!
„Sia treffet sich täglich om viertel noch drei“
„Aber bidde mit Sahne“ isch emmer drbei!
Se senget vom Coschta d Anita so nett
Ond vom Onkel Jürgen des Kornfeld em Bett.

Dr Thommy Schneck, der isch ganz glücklich
Ond er strahlt ond grinst ond lacht,
Weil er sieht wia augablicklich
Älle s‘ Senga Freude macht.
Etzt leget so laos, ha, jetzt hend se Bock!
Se senget da „Cup Song“, noh Pop ond noh Rock.
Se sengat von „Augen wie Schterne so klar“,
Se senget „Anita, so schwarz war ihr Haar“.
Ond se senget von der „Mamma Mi-ah“
Se senget von Champions ond von SOS
Ond während se senget do hen se koin Stress

Ond beim Höra, do kriegsch woiche Knie-ah…
So a Gsang goht oim ufs Gmiat
Ond kurz vor em letschda Liad
Will mr Zugab‘, isch net miad!
Ond mr woiß von vornarei
D Hauptsach isch ond bleibt s isch wohr
Neba dem Musikverei‘ –
Z Wurmlinga dr Jugendchor!